Mini Dame, mini Herre, mir läbe inere krasse Ziit
Hätt je mol öpper dänkt, es chonnt mol so wiit
Früener isch alles klar gsi, i de Schwiiz gohsch id Chele,
Do het niemer deno gfrogt: Was isch denn din Wille?
Ond höt? Multiple Choice isch s neue Normal
Lueg: bim Material hesch die Qual der Wahl
En –ismus wird draghänkt zom zeige wie wichtig
Aber wemmer mol öberleit, isch es eigentlich nichtig
En chliini Explosion verteilt das Züügs i jedi Richtig
Aber Multiple Choice isch au Trumpf i de Religion!
Hauptsach es stimmt för dich – „Toleranz“
Es Patchwork vo Buddha und Eso und Firlefanz
De Satz „Ich wott“ isch scho fasch meh wärt als ... Gott
E dere Ziit läbe mir, es bliibt eus kei Wahl
Dorom die Frog: Isch Jesus real?
Well weners ned isch, de chömmer d Sägel striiche
D Flinte is Chorn rüehre, d Rächnig begliiche
„Lass eus ässe ond trinke, well morn simmer Liiche“
Das schriibt de Paulus de korinthische Grieche
Well stärbe müend alli – die Arme, die Riiche
Aber wenn Jesus real isch, de müemmer öber d Büecher
Denn isch sis Buech es rots Tuech
För so vili Wärt, wo mer zämebraued im Eige-Versuech
„Ich – jetzt – alles!“ Das isch es Zitat vom Markus Spieker
„Ich – jetzt – alles!“ – das schreits usem Ziitgeist sim Loud-Speaker
S „Ich“ isch s Zentrum vo jedem persönliche Universum
Aber wehe de Galileo Galilei säit, es seg alles anderschome
„Jetzt“ isch de Ziitpunkt, woni da, woni wott, bechome
Aber wehe es goht om Jesus, wo au jetzt noni do isch, 2000 Johr nochem Satz: „I chome“
„Alles“ isch d Mängi vo de Möglichkeite, du wirsch vo dim Facebook bestomme
Aber wehe hesch öppis verpasst, de läbsch nor no verschwomme
E dere Wält a Jesus z glaube isch ned verrückt ond vo geschter
Aber es isch rebellisch, ufopfernd, ond s Härz wird feschter
E dere Wält a Jesus z glaube macht ned berüemt ond beliebt
Aber es macht barmhärzig, ond weisch was? Du bisch gliebt!
Was heisst jetzt das „Follow Jesus“? Jesus nochefolge...
Es isch so wichtig, dass mer das begriffe, well chonnsch ned noche, hets Folge...
D Beziehig zo eus isch Gott wichtiger als s Läbe vo sim eigete Sohn
Obwohl de normali Gang der Dinge wär: Ewige Tod isch de Sönd ihre Lohn
Aber Jesus isch cho, om dor sin Chrüz-Tod eus d Strof för eusi Sönd z erloh
Das isch wohr, ond agnoh du glaubsch, isch es so, dass d ihm dis Läbe avertrausch
Denn ghörts nömm der, ond alles, was d guet machsch, bringt ned der, sondern ihm d Ehr
Mer lönd alli Rächt uf Wohlstand, Riichtum, Gsundheit go
aber deför chöne mir vor ihm bestoh,
Die verbländeti Wält säit: Das alles muesch JETZT ha!
Ond Jesus? Verlüügne dis Ego, nemm dis Chrüz uf dich und folg mer no!
Wie au immer die Nochfolg usgseht: Hauptsach mer läbe euses Läbe ned för eus
Ond wenn „Ich – Mich – Meiner – Selbst“ dich bestimmt, denn esch Ziit för Neus
S Läbe mit Jesus isch en Wäg zwüsche Skylla und Charybdis
Zwüsche Stolz und Versäge, festhebe a ihm bis zur Apokalypsis
Will s Ändi wird cho, Jesus chonnt zrogg
Denn wird s Ändi en Afang, ond Jesus isch d Brugg
Er isch eusi Hoffnig, nüüt Irdischs, wo vergoht
Hebe mer fescht anere Sach, wo wine luggi Schruube loht?
Lömmer eus reinige und richte mer euse Fokus uf Gott
Dass mer die himmlische Schätz gsänd ond ned de wältlechi Schrott
Eimal stömmer vor em himmlische Thron
Milliarde vo Mönsche ond kein einzige en Klon
S Läbe zieht e Sekondeschnelli nomol a eus verbii
Bisch din eigete Herr, isch es sicher au läbenswärt gsi
Aber dass es au uf ewig läbenswärt bliibt, git elei d Nochfolg vo Jesus d Garantie
